第二十二回：借洋钱赎身初定议 买物事赌嘴早伤和
黄翠凤因要出局，慌忙吃毕夜饭，即喊小阿宝舀面水来，对镜捕面。罗子富问：「叫到后马路啥场花？」翠凤道：「原是钱公馆哉㖏。俚哚是牌局，一去仔末就要我代碰和。我要无拨啥转局，一径碰下去勿许走。有辰光两三点钟坐来浪，厌气得来。」子富道：「厌气末就谢谢覅去哉。」翠凤道：「叫局阿好勿去？倪无娒要说个。」子富道：「耐无娒阿敢来说耐？」翠凤道：「无娒末啥勿敢说，我一径勿曾做差啥事体，生来无娒勿说啥。倘然推扳仔一点点，倪个无娒肯罢哉？」说时，赵家娒取出出局衣裳。翠凤一面穿换，一面叮嘱子富道：「耐坐来浪，我去一歇歇就转来个。」又叮嘱金凤「覅走开」；又令小阿宝喊珠凤也来陪坐。
然后，赵家娒提了琵琶及水烟筒袋前行，翠凤随著，下楼登轿，径至后马路钱公馆门前停下。望见客堂里灯烛辉煌，又听得高声豁拳，翠凤祇道是酒局。及进去看时，席上祇有杨柳堂、吕杰臣、陶云甫暨主人钱子刚四位，方知为碰和的便夜饭。
杨柳堂一见黄翠凤，嚷道：「来得正好，请耐吃两杯酒。」即取一鸡缸杯送到翠凤嘴边。翠凤侧首让过，道：「我勿来吃。」柳堂还要纠缠。翠凤不理，径去靠壁高椅坐下。钱子刚忙起身向柳堂道：「耐去豁拳，我来吃。」便接了那杯酒。柳堂归座与吕杰臣豁拳。
钱子刚执杯在手，告诉黄翠凤道：「倪四家头来里捉赢家，我一连输十拳哚，吃仔八杯，剩两杯勿曾吃。耐阿吃得落，替我代一杯，阿好？」翠凤听说，接来呷乾，授还杯子，又说：「再有一杯去拿得来。」子刚道：「就剩一杯哉，让赵家娒代仔罢。」赵家娒向桌上取一杯来，也吃了。
陶云甫怂恿杨柳堂道：「耐末也算得是谄头哉，一样一杯酒，钱老爷教俚代，耐看俚吃得阿要快。」黄翠凤乃道：「耐是会说得来，吃杯酒也要说多花闲话哚。一样是朋友，耐帮仔杨老爷来说倪，赛过来里说钱老爷。让耐去说末哉，勿关倪事。」吕杰臣道：「故歇我输哉，耐也替我代一杯，让俚说勿出啥。」翠凤道：「吕老爷，勿然是代末哉，故歇拨俚说仔了，定归勿代。」
杨柳堂催吕杰臣：「快点吃，吃好仔倪要碰和哉。」黄翠凤问：「阿曾碰歇？」钱子刚说：「四圈庄碰满哉，再有四圈。」吕杰臣吃完拳酒，因指陶云甫：「挨著耐捉赢家哉。」陶云甫遂与杨柳堂豁起拳来。
黄翠凤生恐代酒，假作随喜，避人左厢书房。祇见书房中央几案纵横，筹牌错杂，四枝膻烛，却已吹灭，惟靠窗烟榻上烟灯甚明，随意坐在下手。随后钱子刚也到书房里，向上手躺著吸烟。翠凤乃问道：「倪无娒阿曾向耐借洋钱？」子刚道：「借末勿曾借，前日夜头我搭俚讲讲闲话，俚说故歇开消末大，洋钱无拨下来，勿过去，好像要搭我借。后来一泡仔讲别样事体，俚也就勿曾说起。」
翠凤道：「倪无娒个心思重得野哚，耐倒要当心点。前转耐去镶仔一对钏臂，俚搭我说：『钱老爷一径无拨生意，倒勿晓得陆里来个多花洋钱？』我说：『客人个洋钱末，耐管俚陆里来个嗄。』俚说：『倪无拨洋钱用，勿晓得洋钱才到仔陆里去哉。』我是气昏仔了，勿去说俚哉。耐想该号闲话俚是啥意思？」子刚道：「耐教我当心点，阿是当心俚借洋钱？」翠凤道：「俚要向耐借洋钱末，耐定归覅借拨俚。随便啥物事，耐也覅去搭我买。耐故歇就说是买拨我，隔两日终是俚哚个物事。俚哚一点点勿见好，倒好像耐洋钱多煞来浪，害俚哚眼热煞。耐勿买倒无啥。」
子刚道：「俚倒一径搭耐蛮要好，故歇俚转差仔啥个念头，勿相信耐哉，阿对？」翠凤道：「一点勿差。故歇是俚有心要难为我。前月底，有个客人动身，付下来一百洋钱局帐。俚有仔洋钱，十块廿块，才拨来姘头借得去。今朝要付裁缝帐，无拨哉，倒向我要洋钱。我说：『我末啥场花有洋钱嗄？出局衣裳，生来要耐做个啘。耐晓得今朝要付裁缝帐，为啥拨姘头借得去？』拨我反仔一泡，俚倒吓得勿响哉。」
子刚道：「价末今朝阿曾拨点俚？」翠凤道：「我为仔第一转，绷绷俚场面，就罗个搭借仔十块洋钱拨俚。依仔俚心里，倒勿是要借罗个洋钱，要我来请耐向耐借，再要多借点，故末称心哉。」子刚道：「实概说，俚勿曾借著我个洋钱，陆里会称心嗄？倘然俚向我借，我倒也勿好回头俚。」翠凤道：「耐勿借也无啥啘，啥该应要借拔俚？耐说『我一径无拨生意了，洋钱也无拨哉』，阿是说得蛮体面？到仔节浪，通共叫几个局，该应付几花洋钱，局帐清爽仔，俚阿好说耐啥邱话？」子刚道：「故是俚要恨煞哉。我说，俚不过要借洋钱，就少微借点拨俚，也有限煞个。再哝两节，等耐赎仔身末，好哉啘。」翠凤道：「我覅。耐同俚阿有啥讲究，定归要借拨俚，阿是真个洋钱忒多仔了？就算耐洋钱多，等我赎仔身借拨我末哉啘。」子刚道：「故歇耐阿想赎身？」翠凤连忙摇手，叫他莫说。再回头向外窥觑，却正见一个人影影绰绰站在碧纱屏风前，急问：「啥人嗄？」那人见唤，拍手大笑而出。原来是吕杰臣。
钱子刚丢下烟枪起坐，笑道：「耐来里吓人。」吕杰臣道：「我是来里捉奸！耐哚两家头阿要面孔？就是要偷局末。也好等倪客人散仔，舒舒齐齐去上末哉啘，啥一歇歇也等勿得嗄！」黄翠凤咕噜道：「狗嘴里阿会生出象牙来。」
吕杰臣再要回言，被钱子刚拉至客堂归席。杨柳堂道：「倪输仔拳，酒也无人代，耐主人家倒寻开心去哉。」陶云甫道：「故歇让耐去开心晚歇碰和末抵桩多输点。」钱子刚并不置辨，祇问拳酒如何。四人复哄饮一回，始用晚饭。饭后，同至书房点烛碰和。钱子刚因吸烟过瘾，请黄翠凤代碰。
翠凤碰过两圈，赢了许多，愈党高兴，乃喊赵家娒来附耳叮嘱些说话。赵家娒领会，独自踅回家中，径上楼寻罗子富。不料子富竟不在房，祇有黄珠凤垂头伏桌打瞌铳。赵家娒拎起珠凤耳朵，问：「罗老爷呢？」珠凤醒而茫然，对答不出。连问几遍，方说道：「罗老爷去哉呀。」赵家娒问：「陆里去嗄？」珠凤道：「勿晓得口宛。」
赵家娒发怒，将指头照珠凤太阳里戳了一下，又下楼至小房间问黄二姐。黄二姐告诉道：「罗老爷末拨朋友请到吴雪香搭吃酒去哉。耐去搭大先生说，早点转来去转局。」赵家娒道：「价末等罗老爷票头来仔，我带得去罢。故歇俚也勿肯转来啘。」黄二姐应承了。等够多时，才接到罗子富局票，果然是叫到东合兴里吴雪香家的。
赵家娒手执票头，重往后马路钱公馆来。一进门口，见左厢书房里黑魆魆地并无灯光，知道碰和已毕，客人已散，即转身进右厢内室，见了钱子刚的正妻，免不得叫声「太太」。那钱太太倒眉花眼笑说道：「阿是按先生转去？先生来哚楼浪，耐就该搭等一歇末哉。」赵家娒祇得坐下，却慢慢说出要去转局。钱太太道：「先生有转局末，早点去罢，晚仔勿局个。耐到楼梯下头去喊一声㖏。」
赵家娒急至后半间，仰首扬声叫「大先生」，楼上不见答应；又连叫两声，说：「要转局去呀。」仍是寂然毫无声息。钱太太又叫住道：「覅喊哉，先生听见个哉。」赵家娒没法，仍出前半间陪钱太太对坐闲话。
一会儿，听得黄翠凤脚声下楼，赵家娒忙取琵琶及水烟筒袋上前相迎。翠凤盛气嗔道：「啥要紧嗄，●喤●喤勿清爽。」钱太太含笑分解道：「俚末也算勿差，为仔票头来仔歇哉，常恐忒晚仔勿局，喊耐早点去。」翠凤不好多言，和钱太太立谈两句，道谢辞行。钱太太直送至客堂前，看著翠凤上轿方回。
赵家娒跟在轿后，径往东合兴里吴雪香家，搀了翠凤到台面上，祇见客人、倌人、娘姨、大姐早挤得密层层没些空隙。罗子富座后紧靠妆台，赵家娒挤不进去。适罗子富与王莲生并坐。王莲生叫的局乃是张蕙贞，见了黄翠凤，即挪过自己坐的凳子，招呼道：「翠凤阿哥，该搭来㖏。」又招呼赵家娒，觉得著实殷勤，异常亲密。黄翠凤见张蕙贞金珠首饰奕奕有光，知道是新办的，因携著手看了看，道：「故歇名字戒指也老样式哉。」
张蕙贞见黄翠凤头上插著一对翡翠双莲蓬，也要索观。黄翠凤拔下一祇授与张蕙贞，蕙贞道：「绿头倒无啥。」不料王莲生以下即系主人葛仲英坐位，背后吴雪香听得张蕙贞赞好，便伸过头来一看，问黄翠凤：「几花洋钱买个？」翠凤说是「八块」。吴雪香忙向自己头上拔下一祇，将来比试。张蕙贞见是全绿的，乃道：「也无啥。」吴雪香艴然道：「也无哟我一对四十块洋钱哚呀，阿是也无啥。」
黄翠凤听说，从吴雪香手里接来估量一回，问道：「阿是耐自家买个嗄？」吴雪香道：「买是客人去买得来个，来里城隍庙茶会浪。俚哚才说勿贵，珠宝店里陆里肯嗄？」张蕙贞道：「倪是倒也看勿出。拿俚一对来比仔末，好像好点。」吴雪香道：「翡翠个物事难讲究哚，少做好一点就难得看见哉。我一对莲蓬，随便啥物事总比勿过俚。四十块洋钱，是实概模样呀。」
黄翠凤微笑不言，将莲蓬授还吴雪香。张蕙贞也将莲蓬授还黄翠凤。葛仲英正在打庄，约略听得吴雪香说话，不甚清楚。及三拳豁毕，即回头问吴雪香：「啥物事要四十块洋钱？」吴雪香遂将莲蓬授与葛仲英，仲英道：「耐上仔当哉，陆里有四十块洋钱嗄？买起来不过十块光景。」吴雪香道：「耐末晓得啥嗄，自家勿识货。再要批拓，十块光景耐去买哉㖏！」罗子富道：「拿得来我来看。」擘手接过莲蓬来。黄翠凤道：「耐也是勿识货个末，看啥嗄？」罗子富大笑道：「我真个也勿识货。」遂又将莲蓬传与王莲生。莲生向张蕙贞道：「比仔耐头浪一对好多花哉。」张蕙贞道：「故是自然。我一对阿好比嗄！」吴雪香接嘴道：「耐也有来浪，让我看阿好。」张蕙贞道：「我一对是一点勿好个，难再要去买一对。」说著，也拔下一只，授与吴雪香。雪香问：「几块洋钱？」张蕙贞笑道：「耐一对末，我要买十对哚。」吴雪香道：「四块洋钱，生来无拨啥好物事买哉。耐再要买，情愿价钱大点。价钱大仔物事总好哉啘。」张蕙贞笑著，随向王莲生手里取那莲蓬和吴雪香更正。
当时临到罗子富摆庄，「五魁」、「对手」之声隆隆然如春霆震耳，才把吴雪香莲蓬议论剪断不提。
原来这一席除罗子富、王莲生以外，都是钱庄朋友。祇为葛仲英同吴雪香恩爱缠绵，意不在酒，大家争要凑趣，不肯放量，勉强把罗子富的庄打完，就草草终席而散。
吴雪香等客人散尽了，重复和葛仲英不依，道：「我来里说闲话末，耐该应也帮我说句把，故末算得耐要好。耐倒来扳我个差头，阿要诧异？我说一对莲蓬要四十块洋钱哚，真个四十块洋钱，勿是我骗耐啘。耐勿相信，去问小妹姐好哉。耐一歇极得来，常恐倪要耐拿出四十块洋钱来，连忙说十块。就是十块末，阿是耐搭我去买得来嗄？耐就搭我买仔一祇洋铜钏臂连一祇表，也说是三十几块哚。说到我自家个物事末就勿稀奇哉。耐心里祇道仔我是蹩脚倌人，陆里买得起四十块洋钱莲蓬，祇好拿洋铜钟臂来当仔金钏臂带带个哉，阿是？」一顿夹七夹八的胡话，倒说得仲英好笑起来，道：「故末阿有啥要紧嗄？就是四十块末也勿关我事。」雪香道：「价末耐说啥十块嗄？耐说是十块末，耐去照式照样买得来，我再要买一副头面㖏。洋钱我自家出末哉，耐去搭我买！」仲英笑道：「覅说哉，我去买末哉。」雪香道：「耐是来里搭浆啘，我明朝就要个㖏。」仲英道：「我今朝夜头去买，阿好？」雪香道：「好个，耐去㖏。」
仲英真个取马褂来著，恰遇小妹姐进房，慌道：「二少爷做啥？」正是拦阻，雪香丢个眼色，不使上前。仲英套上扳指，挂上表袋，手执折扇，笑向雪香道：「我去哉。」雪香一把拉住，问：「耐到陆里去？」仲英道：「耐教我买物事去啘？」雪香道：「好个，我搭耐一淘去。』携了仲英的手便走。踅至帘前，仲英立定不行，雪香尽力要拉出门外去。小妹姐在后拍手大笑道：「拨巡捕来拉得去仔末好哉。」客堂里外场不解何事，也来查问。小妹姐乃做好做歹劝进房里，仍替仲英宽去马褂。
雪香撅著嘴，坐在一傍，嘿然不语。仲英祇是讪笑。小妹姐亦呵呵笑道：「两个小乾仵并仔一堆末，成日个哭哭笑笑，也勿晓得为啥，阿要笑话？」仲英道：「对勿住，倒难为耐老太太讨气。」小妹姐道：「划一，我真个气煞来里。」说罢自去。
仲英踅至雪香面前，低声笑道：「耐阿听见，拨俚哚当笑话。一点无拨啥事体，瞎噪仔一泡，故末算啥㖏？」雪香不禁「嗤」的笑道：「耐阿要再搭我强了？」仲英道：「好哉，耐便宜个哉。」雪香方欢好如初。
仲英听得外场关门声响，随取下表袋看时，已至一点多钟，说道：「天勿早哉，倪困罢。」雪香问：「阿要吃稀饭？」仲英说：「覅吃。」雪香即喊小妹姐来收拾。小妹姐舀水倾盆，铺床叠被。
正在忙乱之际，忽然一个小大姐推进大门，跑至房里，赶著小妹姐叫一声「无娒」，便将袖子掩口要哭。小妹姐认得是外甥女，名叫阿巧，住在卫霞仙家的，急问他道：「耐故歇跑得来做啥？」那阿巧要说，却一时说不出口。
第二十二回终。