第三十四回：沥真诚淫凶甘伏罪 惊实信仇怨激成亲
来安暨沈小红兄弟在客堂里等了多时，娘姨阿珠出来，却和沈小红兄弟先回。来安又等一会，洪善卿才出来，向来安道：「俚哚教我劝劝王老爷。倪是朋友，倒有点间架头。要末同仔王老爷到俚搭去，让俚哚自家说，耐说阿对？」
来安那有不对之理，满口答应。善卿即带来安同行，仍坐东洋车，逞往四马路东合兴里张蕙贞家。
其时王莲生正叫了四祇小碗，独酌解闷。善卿进见，莲生让坐。善卿笑道：「昨日夜头辛苦哉？」莲生含笑嗔道：「耐再要调皮，起先我教耐打听，耐勿肯。」善卿道：「打听啥嗄？」莲生道：「倌人姘仔戏子，阿是无处打听哉。」善卿道：「耐自家勿好，同俚去坐马车，才是马车浪坐出来个事体。我阿曾搭耐说：沈小红就为仔坐马车，用场大点，耐勿觉著啘？」莲生连连摇手道：「覅说哉，倪吃酒。」
娘姨添上一副杯筷，张蕙贞亲来斟酒。莲生乃和善卿说：「翡翠头面覅买哉。」另有一篇帐目，开著天青披、大红裙之类，托善卿赶紧买办。善卿笑向蕙贞道：「恭喜耐。」蕙贞羞得远远走开。
善卿正色说莲生道：「故歇耐讨蕙贞先生是蛮好。不过沈小红搭耐就实概勿去仔，终好像勿局㖏。」莲生焦躁道：「耐管俚局勿局！」善卿讪笑婉言道：「勿是呀，沈小红单做耐一个客人，耐勿去仔无投哉！刚刚碰著仔节浪，几花开消才勿著杠，屋里再有爷娘搭兄弟，一家门要吃要用，教俚再有啥法子？四面逼上去，阿是要逼杀俚性命哉？虽然沈小红性命也无啥要紧，九九归原，终究是为仔耐，也算一桩罪过事体。倪为仔白相了，倒去做罪过事体末，何苦呢？」莲生沉吟点头道：「耐是也来浪帮俚哚？」善卿艴然作色道：「耐倒说得稀奇，我为啥去帮俚哚？」莲生道：「耐要我到俚搭去，阿是帮俚哚嗄？」
善卿「咳」的长叹一声，却转而笑道：「耐做仔沈小红末，我一径说无啥趣势，耐勿相信，搭俚恩煞。故歇耐动仔气，倒说我帮俚哚哉，故末真真无啥话头。」莲生道：「价末耐为啥要我去？」善卿道：「我勿是要耐再去做俚，耐就去一埭好哉。」莲生道：「去一埭末做啥嗄？」善卿道：「故末就是替耐算计，常恐有啥事体。耐去仔，俚哚要一放心哚，耐末也好看看俚哚光景。四五年做下来，总有万把洋钱哉，一点点局帐也犯勿著少俚，耐去拨仔俚，让俚去开消仔，节浪也好过去。难下节做勿做，随耐个便，阿是嗄？」
莲生听罢无言。善卿因怂恿道：「晚歇我同耐一淘去，看俚说啥，倘然有半句闲语听勿进末，倪就走。」莲生直跳起来，嚷道：「我勿去！」善卿祇得讪笑剪住。
两人各饮数杯，仍和蕙贞一同吃过中饭。善卿要去代莲生买办，莲生也要暂回公馆，约善卿日落时候原于此处相会。善卿应诺先行。
莲生吸不多几口鸦片烟，就喊打轿，迳归五马路公馆，坐在楼上卧房中，写两封应酬信札。来安在傍伏侍。忽听得吉了当铜铃摇响，似乎有人进门，与莲生的侄儿天井里说话。随后一乘轿子，抬至门首停下。莲生祇道是拜客的，令来安看来。来安一去，竟不覆命，却有一阵「咭咭咯咯」小脚声音踅上楼梯。
莲生自往外间看时，谁知即是沈小红，背后跟著阿珠。莲生一见，暴跳如雷，厉声喝道：「耐再有面孔来见我，搭我滚出去！」喝著，还不住的跺脚。沈小红水汪汪含著两眶眼泪，不则一声。阿珠上前分说，也按捺不下。莲生一顿胡闹，不知说些甚么。
阿珠索性坐定，且等莲生火性稍杀，方朗朗说道：「王老爷，比方耐做仔官，倪来告状，耐也要听明白仔，难末该应打、该应罚，耐好断啘。故歇一句闲话也勿许倪说，耐陆里晓得有冤枉个事体？」莲生盛气问道：「我冤枉仔俚啥？」阿珠道：「耐是勿曾冤枉倪。倪先生有点冤枉，要搭耐说，耐阿要俚说嗄？」莲生道：「俚再要说冤枉末，索性去嫁拨仔戏子好哉啘！」阿珠倒呵呵冷笑道：「俚兄弟冤枉仔俚，好去搭俚爷娘说；俚爷娘冤枉仔俚，再好搭耐王老爷说；耐王老爷再要冤枉俚，真真教俚无处去说哉。」说了，转向小红道：「倪去罢，再说啥嗄？」
那小红亦坐在高椅上，将手帕掩著脸呜呜饮泣。莲生乱过一阵，跑进卧房，概置不睬。小红与阿珠在外间，寂静无声。
莲生提起笔来，仍要写信，久之不能成一字，但闻外间切切说话。接著小红竟踅到卧房中，隔著书桌，对面而坐。莲生低下头祇顾写，小红颤声说道：「耐说我啥个啥个，我倒无啥；我为仔自家差仔点，对勿住耐，随便耐去办我，我蛮情愿。为啥勿许我说闲话，阿是定归要我冤枉死个？」说到这里，一口气奔上喉咙，哽咽要哭。
莲生搁下笔，听他说甚。小红又道：「我是吃煞仔倪亲生娘个亏！先起头末要我做生意，故歇来仔个从前做过歇个客人，定归原要我做。我为仔娘了听仔俚，说勿出个冤枉，耐倒再要冤枉我姘戏子。」
莲生正待回驳，来安匆匆跑上，报说：「洪老爷来。」莲生起身向小红道：「我搭耐无啥闲话，我有事体来里，耐请罢。」说毕，丢下沈小红在房里、阿珠在外间，迳下楼和洪善卿同行，至东合兴里张蕙贞家。
张蕙贞将善卿办的物事与莲生过目。莲生将沈小红陪罪情形，述与蕙贞。大家又笑又叹。当晚善卿吃了晚饭始去。
蕙贞临睡，笑问莲生道：「耐阿要再去做沈小红？」莲生道：「难是让小柳儿去做个哉。」蕙贞道：「耐勿做末，倒覅去糟塌俚。俚教耐去，耐就去去也无啥，祇要如此如此。」莲生道：「起先我看沈小红好像蛮对景，故歇勿晓得为啥，俚凶末勿凶哉，我倒也看勿起俚。」蕙贞道：「想必是缘分满哉。」闲论一回，不觉睡去。
次日五月初三，洪善卿于午后来访莲生，计议诸事，大略齐备，闲话中复说起沈小红来。善卿仍前相劝，莲生先入蕙贞之言，欣然愿往。
于是洪善卿、王莲生约同过访沈小红。张蕙贞送出房门，望莲生丢个眼色，莲生笑而领会。及至西荟芳里沈小红家门首，阿珠迎著，喜出望外，呵呵笑道：「倪祇道仔王老爷倪搭勿来个哉。倪先生勿曾急煞，还好俚。」一路讪笑，拥至楼上房间。
沈小红起身厮见，叫声「洪老爷」、「王老爷」，嘿然退坐。莲生见小红祇穿一件月白竹布衫，不施脂粉，素净异常。又见房中陈设一空，殊形冷落，祇剩一面著衣镜，为敲碎一角，还嵌在壁上，不觉动了今昔之感，浩然长叹。阿珠一面加茶碗，一面搭讪道：「王老爷说倪先生啥个啥个，倪下头问我：『陆里来个闲话？』我说：『王老爷肚皮里蛮明白来浪，故歇为仔气头浪说说罢哉呀，阿是真真说俚姘戏子？』」莲生道：「姘勿姘，啥要紧嗄？覅说哉。」阿珠事毕自去。
善卿欲想些闲话来说，笑问小红道：「王老爷勿来末，耐牵记煞，来仔倒勿响哉。」小红勉强一笑，向榻床取签子烧鸦片烟，装好一口在枪上，放在上手。莲生就躺下去吸，小红因道：「该副烟盘还是我十四岁辰光搭倪娘装个烟，一径放来浪勿曾用，故歇倒用著哉。」
善卿就问长问短，随意讲说。阿珠不等天晚，即请点菜便饭。莲生尚未答应，善卿竟作主张，开了四色去叫。莲生一味随和。
晚饭之后，阿珠早将来安、轿班打发回去，留下莲生，那里肯放。善卿辞别独归，祇剩莲生、小红两人在房。小红才向莲生说道：「我认得仔耐四五年，一径勿曾看见耐实概个动气。故歇来里我面浪动个气，倒也为是搭我要好了，耐气到实概样式。我听仔娘个闲话，勿曾搭耐商量，故末是我勿好。耐要冤枉我姘戏子，我就冤枉死仔，口眼也勿闭个㖏！时髦倌人生意好，寻开心，要去姘戏子；像我生意阿好嗄？我咿勿是小乾仵勿懂事体，姘仔戏子阿好做生意？外头人为仔耐搭我要好末，才来浪眼热。覅说啥张蕙贞，连搭仔朋友也说我邱话。故歇耐去说仔我姘戏子，再有啥人来搭我伸冤？除非到仔阎罗王殿浪刚刚明白哚。」
莲生微笑道：「耐说勿姘就勿姘，啥要紧嗄。」小红又道：「我身体末是爷娘养来浪。除仔身体，一块布，一根线，才是耐办拨我个物事。耐就打完仔，也无啥要紧。不过，耐要豁脱我个人，耐替我想想看，再要活来浪做啥？除仔死，无拨一条路好走。我死也勿怪耐，才是我娘勿好。不过我替耐想：耐来里上海当差使，家眷末也勿曾带。公馆里就是一个二爷，笨手笨脚，样色样勿周到。外头朋友，就算耐知己末，总有勿明白个场花，就是我一个人晓得耐脾气。耐心里要有啥事体，我也猜得著，总称耐个心。就是说说笑笑，大家总蛮对景。张蕙贞巴结末巴结煞，阿能够像我？我是单做耐一个，耐就勿曾讨我转去，赛过是耐个人，才靠耐来里过去。耐心里除仔我，也无拨第二个称心个人来浪。故歇耐为一时之气，豁脱仔我，我是就不过死末哉，倒是替耐勿放心。耐今年也四十多岁哉，倪子、囡仵才勿曾有，身体本底子娇寡，再吃仔两筒烟，有仔个人来浪陪陪耐，也好一生一世快快活活过日脚。耐倒硬仔心肠，拿自家称心个人冤枉杀仔，难下去耐再要有啥勿舒齐，啥人来替耐当心？就是说句闲话，再有啥人猜得著耐个心？睁开眼睛要喊个亲人，一歇也无处去喊。到该个辰光，耐要想著仔我沈小红，我就连忙去投仔人身来伏侍耐，也来勿及个哉！」说著，重复呜呜的哭起来。
莲生仍微笑道：「该号闲话说俚做啥？」小红觉得莲生比前不同，毫无意思，忍住哭，又说道：「我搭耐实概说，耐原无拨回心，我再要说也无啥说个哉。就算我千勿好、万勿好，四五年做下来，总有一点点好处。耐想著我好处末，就望耐照应点我爷娘，我末交代俚哚，拿我放来浪善堂里。倘忙有一日伸仔冤，晓得我沈小红勿是姘戏子，原要耐收我转去，耐记好仔。」
小红没有说完，仍禁不住哭了。莲生祇是微笑。小红更无法子打动莲生。比及睡下，不知在枕头边又有几许柔情软语，不复细叙。
明日起来，莲生过午欲行。小红拉住，问道：「耐去仔阿来嗄？」莲生笑道：「来个。」小红道：「耐覅骗我㖏。我闲话才说完哉，随耐便罢。」莲生佯笑而去。
不多时，来安送来局帐洋钱，小红收下，发回名片。接连三日，不见王莲生来。小红差阿珠、阿金大请过几次，终不见面。
到初八日，阿珠复去请了回来，慌慌张张告诉小红道：「王老爷讨仔张蕙贞哉，就是今朝日脚浪讨得去。」小红还不甚信，再令阿金大去。阿金大回来，大声道：「啥勿是嗄！拜堂也拜过哉，故歇来浪吃酒，闹热得来。我就问仔一声，勿曾进去。」小红这一气，却也非同小可，跺脚恨道：「耐就讨仔别人，倒无啥，为啥去讨张蕙贞？」当下欲往公馆当面问话，辗转一想，终不敢去。阿珠、阿金大没兴散开。小红足足哭了一夜，眼泡肿得像胡桃一般。
这日初九，小红气的病了。不料敲过十二点钟，来安送张局票，来叫小红。叫至公馆里，说是酒局。阿珠叫住来安要问闲话，来安推说无工夫，急急跑去。小红听说叫局，又不敢不去，硬撑著起身梳洗，吃些点心，才去出局。
到了五马路王公馆，早有几肩出局轿子停在门首。阿珠搀小红踅至楼上，祇见两席酒并排在外间，并有一班毛儿戏在亭子间内搬演，正做著《跳墙著棋》一出昆曲。小红见席间皆是熟识朋友，想必是朋友公局，为纳宠贺喜。
洪善卿见小红眼泡肿起，特地招呼，淡淡的似劝非劝，略说两句，正兜起小红心事，迸出一滴眼泪，几乎哭出声来。善卿忙搭讪开去，合席不禁点头暗叹。惟华铁眉、高亚白、尹痴鸳三人不知情节，没有理会。
高亚白叫的系清和坊袁三宝。葛仲英知道亚白尚未定情，因问道：「阿要同仔耐几花长三书寓里才去跑一埭？」亚白摇手道：「耐说个更加勿对，故是『可遇而不可求』个事体。」华铁眉道：「可惜亚白一生侠骨柔肠，未免辜负点。」亚白想起，向罗子富道：「贵相好搭有个叫诸金花，朋友荐拨我，一点无啥好啘。」子富道：「诸金花生来勿好，故歇到仔么二没去哉。」
说时，戏台上换了一出《翠屏山》。那做石秀的倒也慷慨激昂，声情并茂。 做到酒店中，也能使一把单刀，虽非真实本领，毕竟有些工夫。沈小红看见这戏，心中感触，面色一红。高亚白喝声好，但不识其名姓。葛仲英认得，说是东合兴里大脚姚家的姚文君。尹痴鸳见亚白赏识，等他下场，即唤娘姨，说：「高老爷叫姚文君个局。」娘姨忙搀姚文君坐在高亚白背后。亚白细看这姚文君，眉宇间另有一种英锐之气，咄咄逼人。
那时出局到齐，王莲生忽往新房中商议一会出来，却请吴雪香、黄翠凤、周双珠、姚文君、沈小红五人，说到房里去见见新人。沈小红左右为难，不得不随众进见。张蕙贞笑嘻嘻起身相迎，请坐讲话。沈小红又羞又气，绝不开口。临行各有所赠：吴雪香、黄翠凤、周双珠、姚文君四人，并是一祇全绿的翡翠莲蓬。 惟沈小红最重，是一对耳环，一祇戒指。沈小红又不得不随众收谢。退出外间，出局已散去一半。
高亚白复点一出姚文君的戏。这戏做完，出局尽散，因而收场撤席。
第三十四回终。