第十八回：添夹袄厚谊即深情 补双台阜财能解愠
陶玉甫听得李漱芳咳嗽，慌忙至大床前揭起帐子，要看漱芳面色。漱芳回过头来眱了玉甫半日，叹一口气。玉甫连问：「阿有啥勿适意？」漱芳也不答，却说道：「耐个人也好个哉！我说仔几转，教耐昨日转来仔末就来，耐定归勿依我。随便啥闲话，搭耐说仔，耐祇当耳边风。」玉甫急分辨道：「勿是呀，昨日转来末晚哉，屋里有亲眷来浪，难末阿哥说：『阿有啥要紧事体，要连夜赶出城去？』我阿好说啥㖏？」
漱芳鼻子里「哼」的一声，说道：「耐覅来搭我瞎说！我也晓得点耐脾气。要说耐外头再有啥人来浪，故也冤枉仔耐哉。耐总不过一去仔末就想勿著，等耐去死也罢、活也罢，总勿关耐事，阿对？」玉甫陪笑道：「就算我想勿著，不过昨日一夜天，今朝阿是想著仔来哉？」漱芳道：「耐是勿差，一䀣困下去，困到仔天亮末，一夜天就过哉。耐阿晓得困勿著了，坐来浪，一夜天比仔一年还要长点㖏！」玉甫道：「总是我勿好，害仔耐。耐覅动气。」
漱芳又嗽了几声，慢慢的说道：「昨日夜头，天末也讨气得来，落勿停个雨。浣芳㖏，出局去哉。阿招末，搭无装烟。单剩仔大阿金，坐来浪打磕铳。我教俚收抬好仔去困罢。大阿金去仔，我一干仔就榻床浪坐歇，落得个雨来加二大哉！一阵一阵风吹来哚玻璃窗浪，乒乒乓乓，像有人来哚，连窗帘才卷起来，直卷到面孔浪。故一吓末，吓得我来要死， 难末祇好去困。到仔床浪㖏，陆里困得著嗄？间壁人家刚刚来哚摆酒、豁拳、唱曲子，闹得来头脑子也痛哉。等俚哚散仔台面末，台子浪一只自鸣钟，跌笃跌笃。我覅去听俚，俚定归钻来里耳朵管里。再起来听听雨末，落得价高兴。望望天末，永远勿肯亮个哉。一径到两点半钟，眼睛算闭一闭。坎坎闭仔眼睛，倒说道耐来哉呀，一肩轿子抬到仔客堂里。看见耐轿子里出来，倒理也勿理我，一径望外头跑，我连忙喊末，自家倒喊醒哉。醒转来听听，客堂里真个有轿子钉鞋脚地板浪声音，有好几个人来浪。我连忙爬起来，衣裳也勿著，开出门去，问俚哚：『二少爷啥？』相帮哚说：『陆里有啥二少爷嗄』我说：『价末轿子陆里来个嗄？』俚哄说：『是浣芳出局转来个轿子。』倒拨俚哚好笑，说我困昏哉。我再要困歇，也无拨我困哉，一径到天亮，咳嗽勿曾停歇。」
玉甫攒眉道：「耐啥实概嗄。耐自家也保重点个㖏。昨日夜头风末来得价大。半夜三更勿著衣裳起来，再要开出门去，阿冷嗄？耐自家勿晓得保重，我就日日来里看牢仔耐，也无么用啘。」
漱芳笑道：「耐肯日日来里看牢仔我，耐也祇好说说罢哉。我自家晓得命里无福气。我也勿想啥别样，再要耐陪我三年。耐依仔我，到仔三年我就死末，我也蛮快活哉。倘忙我勿死，耐就再去讨别人，我也勿来管耐哉。就不过三年，耐也勿肯依我，倒说道，『日日来里看牢仔我』！」玉甫道：「耐说说末就说出勿好来哉。耐单有一个无娒离勿开。再三四年，等耐兄弟做仔亲，让俚哚去当家，耐搭无娒到我屋里向去，故末真个日日看牢仔耐，耐末也称心哉。」
漱芳又笑道：「耐是生来一径蛮称心，我陆里有故号福气？我不过来里想：耐今年廿四岁，再欧三年，也不过廿七岁。耐廿七岁讨一个转去，成双到老，要几十年哚。该个三年里向，就算我冤屈仔耐也该应啘。」玉甫也笑道：「耐瞎说个多花啥，讨转去成双到老末就是耐啘。」
漱芳乃不言语了。祇见李浣芳蓬著头，从后门进房，一面将手揉眼睛，一面见玉甫，说道：「姐夫，耐昨日啥勿来嗄？」玉甫笑嘻嘻拉了浣芳的手过来，斜靠著梳妆台而立。漱芳见浣芳祇穿一件银红湖绉捆身子，遂说道：「耐啥衣裳也勿著嗄？」浣芳道：「今朝天热呀。」漱芳道：「陆里热嗄，快点去著仔㖏！」浣芳道：「我覅著，热煞来里。」
正说著，阿招已提了一件玫瑰紫夹袄来，向浣芳道：「无娒也来供说哉，快点著罢。」浣芳还不肯穿。玉甫一手接那夹袄替浣芳披在身上，道：「耐故歇就著仔，晚歇热末再脱末哉，阿好？」浣芳不得已依了。阿招又去舀进脸水请浣芳捕面、梳头，漱芳也要起身。玉甫忙道：「耐再困歇㖏，天早来里。」漱芳说：「我覅困哉。」玉甫祇得去扶起来，坐在床上，复劝道：「耐就床浪坐歇，倪说说闲话倒无啥。」漱芳仍说：「覅。」
及至漱芳下床，终觉得鼻塞声重，头眩脚软，惟咳嗽倒好些。漱芳一路扶著桌椅，步至榻床坐下，玉甫跟过来放下一面窗帘。大阿金送上燕窝汤，漱芳祇呷两口，即叫浣芳吃了。浣芳新妆既罢，漱芳方去捕起面来。阿招道：「头还蛮好来里，覅梳哉。」漱芳也觉坐不住，就点点头。大阿金用棍子蘸刨花水略刷几刷，漱芳又自去刷出两边鬓脚，已是吃力极了，遂去歪在榻床上喘气。
玉甫见漱芳如此，心中虽甚焦急，却故作笑嘻嘻面孔。单有浣芳立在玉甫膝前，呆呆的祇向漱芳呆看。漱芳问他：「看啥？」浣芳说不出，也自笑了。大阿金正在收拾镜台，笑道：「俚末看见阿姐勿适意仔，也勿起劲哉，阿晓得？」浣芳接说道：「昨日蛮好来里，才是姐夫勿好啘，倪勿来个。」说著便一头撞在玉甫怀里不依。玉甫忙笑道：「俚哄骗耐呀。无啥勿适意，晚歇就好哉。」浣芳道：「晚歇再勿好末，要耐赔还个好阿姐拨倪。」玉甫道：「晓得哉，晚歇我定归拨耐个好阿姐末哉。」浣芳听说方罢。
漱芳歪在榻床上，渐渐沉下眼睛，像要睡去。玉甫道：「原到床浪去困罢？」漱芳摇摇手。玉甫向藤椅子上揭条绒毯，替漱芳盖在身上，漱芳憎道：「重。」仍即揭去。玉甫没法，祇去放下那一面窗帘。还恐漱芳睡熟著寒，要想些闲话来说，于是将乡下上坟许多景致，略加装点，演说起来。浣芳听得津津有味，漱芳却憎道：「拨耐说得烦煞哉，我覅听。」玉甫道：「价末耐覅困㖏。」漱芳道：「我勿困著末哉，耐放心。」玉甫乃在榻床一边盘膝危坐，静静的留心看守。但害得个浣芳坐不定、立不定，没处著落。漱芳叫他外头去自相歇，浣芳又不肯去。
一会儿，大阿金搬中饭进房。玉甫问漱芳：「阿吃得落？吃得落末吃仔口罢。」漱芳说：「覅吃。」浣芳见漱芳饭都不吃，祇道有甚大病，登时发极，涨得满面绯红，几乎吊下眼泪。倒引得漱芳一笑，说浣芳道：「耐啥实概嗄，我还勿曾死㖏。故歇吃勿落末，晚歇吃。」浣芳自知性急了些，连忙极力忍住。
玉甫因浣芳著急，也苦苦的劝漱芳多少吃点。漱芳祇得令大阿金买些稀饭，吃了半碗。浣芳也吃不下，祇吃一碗。玉甫本自有限。大家吃毕中饭，收抬洗脸。玉甫思将浣芳支使开去，恰好阿招来报说：「无娒起来哉。」浣芳犹自俄延。玉甫催道：「快点去罢，无娒要说哉。」浣芳始讪讪的趔趄而去。
浣芳去后，祇有玉甫、漱芳两人在房里，并无一点声息。不料至四点多钟，玉甫的亲兄陶云甫乘轿来寻。玉甫请进房里，相见就坐。云甫问漱芳：「阿是勿适意？」漱芳说：「是呀。」大阿金忙著预备茶碗，云甫阻止道：「我说句闲话就去，覅泡茶哉。」乃向玉甫道：「三月初三是黎篆鸿生日，朱蔼人分个传单，包仔大观园一日戏酒。篆鸿末常恐惊动官场，勿肯来，难末蔼人另合一个公局，来哚屠明珠搭。勿多几个人，倪两家头也来海。我为此先搭耐说一声，到仔初三日脚浪，大观园里也勿必去哉，屠明珠搭定归要到个。」
玉甫虽诺诺连声，却偷眼去看漱芳。偏被云甫觉得，笑问漱芳道：「耐阿肯放俚去应酬歇？」漱芳不好意思，笑答道：「大少爷倒说得诧异。故是正经事体，总要去个，倪阿有啥勿放俚去嗄？」云甫点头道：「故末勿差。我说漱芳也是懂道理个人，要是正经事体也拉牢仔勿许去，阿算得啥要好嗄？」漱芳不好接说，含笑而已。云甫随说：「我去哉。」玉甫慌忙直站起来，漱芳送至帘下。
云甫踅出门外上轿，吩咐轿班：「朱公馆去。」轿班俱系稔熟，抬出东兴里，往东进中和里。相近朱公馆，朱蔼人管家张寿早已望见，忙跑至轿前禀说：「倪老爷来哚尚仁里林家。」
云甫便令转轿，仍由四马路径至尚仁里林素芬家。认得朱蔼人的轿子还停在门首，陶云甫遂下轿进门。到了楼上房里，朱蔼人迎著，即道：「正要来请耐。我一干仔来勿及哉，屠明珠搭耐去办仔罢。」陶云甫问如何办法。朱蔼人向身边取出一篇草帐，道：「倪末两家弟兄搭李实夫叔侄，六个人作东，请于老德来陪客。中饭吃大菜，夜饭满汉全席。三班毛儿戏末，日里十一点钟一班，夜头两班，五点钟做起。耐说阿好？」陶云甫道：「蛮好。」
林素芬等计议已定，方上前敬瓜子。陶云甫收了草帐，也就起身，说：「我还有点事体，再见罢。」朱蔼人并不挽留，与林素芬送至楼梯边而别。
素芬回房，问蔼人：「啥事体？」蔼人细细说明缘故。素芬遂说道：「耐请客末勿到该搭来，也去拍屠明珠个马尼，阿要讨气？」葛人道：「勿是我请客，倪六个人公局。」素芬道：「前日仔倒勿是耐请客？」
蔼人没得说，笑了。素芬复道：「倪该搭是小场花，请大人到该搭来，生来勿配。耐也一径冤屈煞哉。难末拣著个大场花，要适意点哚。」蔼人笑道：「难末真真倒诧异哉。我阿曾去做屠明珠，耐啥就吃醋嗄？」素芬道：「耐要做屠明珠去做末哉啘，我也勿曾拉牢仔耐。」蔼人笑道：「我就勿说哉，随便耐去说啥罢。」 素芬鼻子里哼了一声，咕噜道：「耐末去拍屠明珠个马屁，屠明珠阿来搭耐要好嗄？」蔼人笑道：「啥人要俚来要好？」素芬仍咕噜道：「耐就摆仔十个双台，屠明珠也无啥希奇。搭耐要好末倒勿见好，情愿去做铲头客人。上海滩浪也单有耐一个。」蔼人笑道：「耐覅动气，明朝夜头我也来摆个双台末哉。」
素芬呆著脸，也不答言。蔼人过去搀了素芬的手，至榻床前，央及道：「搭我装筒烟㖏。」素芬道：「倪是毛手毛脚，勿比得屠明珠会装㖏。」口中虽如此说，却已横躺著拿签子烧起烟来。
蔼人挨在膝前坐了，又伏下身子向素芬耳朵边低声说道：「耐一径搭我蛮要好，故歇为仔个屠明珠，啥气得来？耐看我阿要去做屠明珠？」素芬道：「耐是倒也说勿定。」蔼人道：「我再去做别人，故末说勿定。要说是屠明珠，就算俚搭我要好末，我也勿高兴去做俚。」素芬道：「耐去做勿做关倪啥事体，耐也覅来搭我说。」蔼人乃一笑而罢。
素芬装好一口烟，放下烟枪，起身走开。蔼人自去吸了，知道素芬还有些芥蒂，遂又自去开了抽屉，寻著笔砚票头随意点几色菜水。素芬看见，装做不理。等蔼人写毕，方道：「耐点菜末，阿要先点两样来吃夜饭？」蔼人忙应说：「好。」另开两个小碗，素芬叫娘姨拿下楼去令外场叫菜。
正是上灯时候，菜已送来，自己又添上四祇荤碟，于是蔼人与素芬对酌闲谈。一时复说起屠明珠来，素芬道：「做倌人也祇做得个时髦。来哚时髦个辰光，自有多花客人去烘起来。客人末真真叫讨气，一样一千洋钱，用拨来生意清点个倌人，阿要好？用拨仔时髦倌人，俚哚觉也勿觉著。价末客人哚定归要去做时髦倌人，情愿豁脱仔洋钱去拍俚马屁。」蔼人道：「耐覅说客人讨气，倌人也讨气。生意清仔末，随便啥客人巴结得非凡哚。稍微生意好仔点，难末姘戏子、做恩客才上个哉，到后来弄得一场无结果。」
素芬道：「姘戏子多花到底少个，故也覅去说俚哉。我看几个时髦倌人，也无啥好结果。耐来里时髦辰光，拣个靠得住点客人，嫁仔末好哉啘，俚哚才勿想嫁人。等到年纪大仔点，生意一清仔末，也好哉。」蔼人道：「倌人嫁人也难。要嫁人，陆里一个勿想嫁个好客人？碰著仔好客人，俚屋里大小老婆倒有好几个来浪，就嫁得去，总也勿称心个哉。要是无拨啥大小老婆末，客人靠勿住，拿耐衣裳、头面才当光仔，再出来做倌人。夷场浪常有该号事体。」
素芬道：「我说要搭客人脾气对末好。脾气对仔，就穷点，祇要有口饭吃吃好哉。要是差仿勿多客人，故末宁可拣个有铜钱点总好点。」蔼人笑道：「耐要拣个有铜钱点，像倪是挨勿著个哉。」素芬也笑道：「噢唷，客气得来！耐算无铜钱，耐来里骗啥人嗄？」蔼人笑道：「我就有仔铜钱，脾气勿对，耐也看勿中啘。」素芬道：「耐说说末就说勿连牵哉。」随取酒壶给蔼人筛酒。蔼人道：「酒有哉，倪吃饭罢。」
素芬遂喊娘姨拿饭来，并令叫妹子翠芬来同吃。娘姨回说：「翠芬吃过哉。」
蔼人、素芬两人刚吃毕饭，即有一帮打茶会客人上楼，坐在对过空房间里，随后复有叫素芬的局票。蔼人趁势要走。素芬知留不住，送至房门。蔼人下楼登轿，径回公馆。
次日晚间，免不得请一班好友在林素芬家摆个双台，不必细说。
至三月初三，十点钟时，朱蔼人起来，即乘轿往大观园。祇见门前挂灯结彩，张寿带著纬帽迎见，禀说：「陈老爷、洪老爷、汤老爷才来里哉。」蔼人进去厮见，动问诸事，皆已齐备。蔼人大喜，乃说道：「价末我到该首去哉，此地奉托三位。」陈小云、洪善卿、汤啸庵都说：「应得效劳。」当时蔼人复乘轿往鼎车里屠明珠家。
第十八回终。